మావోయిస్టు రహిత బస్తర్..లెక్కలతో సహా చెప్పేసిన పోలీసు శాఖ
దశాబ్దాలుగా ఎర్రజెండా నీడలో వణికిన ఛత్తీస్గఢ్లోని బస్తర్ ప్రాంతం ఇప్పుడు శాంతి బాటలో పయనిస్తోంది. గత 31 రోజుల్లో ఏకంగా 170 మంది మావోయిస్టులు భద్రతా దళాల ముందు లొంగిపోవడంతో, “మావోయిస్టు రహిత బస్తర్” లక్ష్యం దాదాపు నెరవేరినట్లేనని బస్తర్ రేంజ్ ఐజీ పి. సుందర్రాజ్ ప్రకటించారు.
కేవలం ఒక నెల వ్యవధిలోనే 170 మంది క్యాడర్లు ఆయుధాలు వదిలి ప్రధాన స్రవంతిలోకి రావడం ఒక రికార్డు. వీరిలో కీలకమైన డివిజనల్ కమిటీ సభ్యులతో పాటు, సీనియర్ నేత పాపారావు వంటి వారు ఉండటం మావోయిస్టు యంత్రాంగానికి పెద్ద దెబ్బ. ప్రభుత్వ అంచనాల ప్రకారం, బస్తర్ ప్రాంతం ఇప్పుడు 96 శాతం మావోయిస్టు రహితంగా మారింది. అడవుల్లో కేవలం 30 నుండి 40 మంది సాయుధ సభ్యులు మాత్రమే మిగిలి ఉన్నారని, వారిని కూడా త్వరలోనే అదుపులోకి తీసుకుంటామని అధికారులు ధీమా వ్యక్తం చేస్తున్నారు.
ఈ ఆపరేషన్లలో కేవలం లొంగుబాట్లే కాకుండా, మావోయిస్టులకు సంబంధించిన ₹6.75 కోట్ల నగదు మరియు 8 కిలోల బంగారాన్ని పోలీసులు స్వాధీనం చేసుకున్నారు. ఇది వారి ఆర్థిక వ్యవస్థను పూర్తిగా చిన్నాభిన్నం చేసింది. కేంద్రం నిర్దేశించిన మార్చి 31, 2026 గడువు లోపే బస్తర్ను పూర్తిస్థాయిలో హింస లేని ప్రాంతంగా మార్చాలన్న సంకల్పంతో భద్రతా దళాలు పనిచేస్తున్నాయి.
లొంగిపోయిన మావోయిస్టుల కోసం ప్రభుత్వం ప్రవేశపెట్టిన ‘పూనా మార్గాం’ (కొత్త దారి) పునరావాస పథకం అద్భుతమైన ఫలితాలను ఇస్తోంది. గత రెండేళ్లలో దాదాపు 2,700 మందికి పైగా మావోయిస్టులు హింసను వీడి సాధారణ జీవితాన్ని గడుపుతున్నారు. వారికి ఉపాధి, విద్య మరియు ఆరోగ్య సదుపాయాలను ప్రభుత్వం కల్పిస్తోంది.
