యూకేకి రవిశంకర్ బృందం, అమెరికాకి థరూర్ బృందం.. ప్రకటించిన కేంద్రం

ఉగ్రవాదాన్ని పెంచిపోషిస్తూ భారత్ పై ఉగ్రవాదులను ఎగదోస్తున్న పాకిస్తాన్ ను అంతర్జాతీయంగా ఎండగట్టాలని భారత్ నిర్ణయించిన విషయం తెలిసిందే. ఇందుకోసం ఏడు అఖిలపక్ష బృందాలను కూడా ఏర్పాటు చేసింది. అయితే ఏయే బృందాలు, ఏయే దేశాలకు వెళ్లనున్నాయో కేంద్ర ప్రభుత్వం ఆదివారం ఉదయం జాబితాను విడుదల చేసింది. పార్లమెంటరీ వ్యవహారాల మంత్రి కిరణ్ రిజిజు ఈ జాబితాను విడుదల చేశారు.

పహల్గాం ఉగ్రదాడి తర్వాత ‘ఆపరేషన్ సిందూర్’ చేపట్టిన భారత్, ఇప్పుడు పాకిస్థాన్​పై దౌత్య యుద్ధానికి సిద్ధమవుతోంది. పాకిస్థాన్​ ప్రేరేపిత ఉగ్రవాదం గురించి అంతర్జాతీయ వేదికలపై మాట్లాడేందుకు అఖిలపక్ష బృందాలను వివిధ దేశాలకు పంపనుంది. వచ్చే వారమే భారత అఖిలపక్ష బృందాల విదేశీ పర్యటనలు మొదలవుతాయి. దాదాపు 10 రోజుల పాటు ఈ పర్యటనలు కొనసాగుతాయి.కేంద్ర ప్రభుత్వం సూచించే దేశాలలో అఖిలపక్ష బృందాలు పర్యటిస్తాయి. ఈ దౌత్యపరమైన కసరత్తులో భాగమయ్యేందుకు భారత్‌లోని విపక్ష పార్టీలు కూడా అంగీకారం తెలిపాయి. దీంతో ఆయా ప్రతిపక్ష పార్టీల సభ్యులకూ అఖిలపక్ష బృందాలలో చోటును కల్పించారు.