హెచ్ఏఎల్ కు ‘”మహారత్న” హోదా.. 14 వ కంపెనీగా రికార్డుల్లోకి

ప్రభుత్వ రంగ సంస్థ హిందుస్థాన్ ఏరోనాటిక్స్ లిమిటెడ్ (హెచ్ఏఎల్)కు భారత ప్రభుత్వం ‘మహారత్న’ హోదా కల్పించింది. భారతదేశంలో 14వ మహారత్న కంపెనీగా హెచ్ఏఎల్ నిలిచింది. హెచ్ఏఎల్ కు మహారత్న హోదాను కల్పించడానికి ఆర్థిక మంత్రి నిర్మల సీతారామన్ ఆమోదం తెలిపారని డిపార్ట్మెంట్ ఆఫ్ పబ్లిక్ ఎంటర్ ప్రైజెస్ తెలిపింది.

హిందుస్థాన్ ఏరోనాటిక్స్ లిమిటెడ్ (హెచ్ఏఎల్) కు మహారత్న హోదా కల్పించే ప్రతిపాదనను ఆర్థిక కార్యదర్శి నేతృత్వంలోని ఇంటర్ మినిస్టీరియల్ కమిటీ, కేబినెట్ కార్యదర్శి నేతృత్వంలోని అపెక్స్ కమిటీ గతంలో సిఫారసు చేశాయి. డిపార్ట్మెంట్ ఆఫ్ డిఫెన్స్ ప్రొడక్షన్ (డిఓడిపి) సీపీఎస్ఈగా ఉన్న హెచ్ఏఎల్ 2023-24 ఆర్థిక సంవత్సరంలో రూ.28,162 కోట్ల వార్షిక టర్నోవర్, రూ.7595 కోట్ల నికర లాభాన్ని ఆర్జించింది.