రాజ్యాంగాన్ని నమ్మని వారికి రాజ్యాంగ హక్కులు ఎలా వర్తిస్తాయని, రాజ్యాంగానికి వ్యతిరేకంగా పోరాడే వారికి మానవ హక్కుల గురించి మాట్లాడే హక్కు ఎవరిచ్చారని, అసలు ఎలా ఆపాదిస్తున్నారని సీనియర్ పాత్రికేయులు, నేషనలిస్ట్ హబ్ సీఈవో సాయికృష్ణ ప్రశ్నించారు.MMRI సంస్థ ఆధ్వర్యంలో ఉస్మానియా యూనివర్శిటీలోని PGRRCDE ఆడిటోరియంలో ”నక్సల్స్ నరమేధం – మేధో మథనం” అన్న పేరుతో జరుగుతున్న సదస్సులో ప్రసంగించారు. పార్లమెంటరీ, ప్రజాస్వామ్య ప్రక్రియలో ఓటు హక్కు అనేది అత్యంత కీలకమని, దానినే బహిష్కరిస్తామనే వారికి రాజ్యాంగం, పార్లమెంట్ అని పదే పదే ప్రస్తావించడం అత్యంత విరుద్ధమని అన్నారు. దీని విషయంలో తర్కం లేని మాటలు మాట్లాడుతున్నారని అన్నారు.

1958 నుంచి 62 మధ్య కాలంలో మావో సేటుంగ్ గ్రేట్ లీఫ్ ఫార్వడ్ అన్న నినాదం తెచ్చారని, అడవులను నరికేయాలని స్వయంగా మావో సేటుంగ్ పిలుపునిచ్చారని వెల్లడించారు. కానీ ఇప్పటి మావోయిస్టులు తరుచూ అటవీ సంపద, అడవుల రక్షణ, వన సంపద గురించి మాట్లాడుతుంటారని, అదో విడ్డూరమని దెప్పిపొడిచారు.అలాగే ఫోర్ బెస్ట్ క్యాంపెన్ అని ఓ పిలుపునిచ్చారని దీని ద్వారా పిచ్చుకలు, ఎలుకలు, ఈగలు, దోమలను చంపాలని ఓ తెలివి తక్కువ ఆలోచన చేశారని, దీని ద్వారా పంట ఉత్పాదకత పెంచాలని పిలుపునిచ్చారని పేర్కొన్నారు. కానీ.. అదే సోకాల్డ్ వామపక్ష మేధావులు ఇప్పుడు అడవుల సంరక్షణ గురించి మాట్లాడుతున్నారని మండిపడ్డారు.దీంతో ఉత్పాదకత తగ్గి, జీవ వైవిధ్యం పూర్తిగా దెబ్బతిందని, చైనాలో దారుణ పరిస్థితి నుంచి బయటపడడానికి చాలా సమయం పట్టిందన్నారు.

అలాగే మరో ఉదాహరణను వివరిస్తూ.. ప్రకృతి, మానవుల మధ్య ఓ సమతౌల్యత వుండాలన్నది అప్పట్లో చైనాలో వుండేదని, కానీ చైనాలో మావోయిజం వచ్చిన తర్వాత ప్రకృతిని ఆక్రమించే సిద్ధాంతాన్ని తెచ్చాడని పేర్కొన్నారు.అక్కడి నుంచే చైనాలో వాతావరణ ఇబ్బందులు వచ్చాయని, పారిశ్రామికీకరణ పెరిగిపోయిందన్నారు. దున్నేవాడిదే భూమి అని ఇక్కడ కమ్యూనిస్టులు అంటున్నారని, కానీ.. చైనాలో మాత్రం భూమి మొత్తం కమ్యూనిస్టు ప్రభుత్వం గుప్పిట్లో వుందన్నారు. అలాంటి వారు హక్కులు, ప్రజాస్వామ్యం గురించి మాట్లాడుతున్నారని, చైనా పద్ధతిని భారత్ లో తీసుకురావడానికి ఇక్కడి కమ్యూనిస్టులు ప్రయత్నాలు చేస్తున్నారని మండిపడ్డారు. ఇక్కడి కమ్యూనిస్టులు కార్మికుల వేతనం గురించి మాట్లాడతారని, చైనాలో మాత్రం కార్మిక చట్టాల గురించి మాట్లాడితే పరిస్థితి ఘోరంగా వుందని, కార్మికులకు అత్యంత తక్కువ వేతనాలు ఇస్తారని అన్నారు. ఇక్కడి కమ్యూనిస్టుల మూలాలన్నీ చైనా నేతల ఆధీనంలోనే వున్నాయన్నారు. అడవిలో సాధు సంతులు, మునులు తపస్సులు చేసేవారని, వారు పట్టణాలకు వస్తే గౌరవించే సంప్రదాయం భారతీయ ధర్మంలోనే వుందన్నారు. అలాంటిది కొందరు నక్సల్స్ సానుభూతిపరులు మనకే పాఠాలు చెబుతున్నారని మండిపడ్డారు.