క్రైస్తవ మతంలోకి మారితే SC హోదా రద్దు.. సుప్రీంకోర్టు సంచలన తీర్పు

హిందూ, సిక్కు లేదా బౌద్ధ మతాలను వదిలి క్రైస్తవ మతంలోకి మారిన వారు తమ షెడ్యూల్డ్ కులాల (SC) హోదాను కోల్పోతారని సుప్రీంకోర్టు సంచలన తీర్పు వెలువరించింది . ఆంధ్రప్రదేశ్ హైకోర్టు గతంలో ఇచ్చిన తీర్పును సమర్థిస్తూ జస్టిస్ ప్రశాంత్ కుమార్ మిశ్రా, జస్టిస్ ఎన్.వి.అంజారియాలతో కూడిన ధర్మాసనం ఈ నిర్ణయాన్ని ప్రకటించింది . గుంటూరు జిల్లాలో దశాబ్ద కాలంగా పాస్టర్‌గా పనిచేస్తున్న ఒక వ్యక్తి, తనపై జరిగిన దాడికి సంబంధించి అట్రాసిటీ చట్టం కింద దాఖలు చేసిన పిటిషన్‌ను విచారిస్తూ కోర్టు ఈ వ్యాఖ్యలు చేసింది.

1950 నాటి రాజ్యాంగ (షెడ్యూల్డ్ కులాలు) ఉత్తర్వుల ప్రకారం.. హిందూ, సిక్కు లేదా బౌద్ధ మతాలకు చెందిన వారు మాత్రమే SCలుగా పరిగణించబడతారు. క్రైస్తవ లేదా ఇస్లాం మతాల్లో కుల వ్యవస్థ లేనందున, ఆ మతాల్లోకి మారిన వారికి ఎస్సీ రిజర్వేషన్లు వర్తించవు అని ధర్మాసనం పేర్కొంది. అలాగే క్రైస్తవ మతంలోకి మారిన వ్యక్తిపై దాడి జరిగినా, వారు SC/ST (అట్రాసిటీ నిరోధక) చట్టం కింద ఫిర్యాదు చేసే హక్కును కోల్పోతారు. ఎందుకంటే మతం మారిన వెంటనే వారు రాజ్యాంగబద్ధంగా ఎస్సీ హోదాను కోల్పోయినట్లేనని కోర్టు స్పష్టం చేసింది.

ప్రభుత్వ రికార్డుల్లో కుల ధ్రువీకరణ పత్రం రద్దు కాకపోయినప్పటికీ, వాస్తవంగా మతం మారిన వ్యక్తి ఎస్సీ హోదాకు అర్హుడు కాడని ధర్మాసనం పేర్కొంది. మతం మారిన వ్యక్తి తిరిగి తన పాత హోదాను పొందాలంటే, అతను మళ్ళీ తన మాతృ మతంలోకి (హిందూ/సిక్కు/బౌద్ధం) మారి, ఆ కుల సమాజం అతడిని సభ్యుడిగా తిరిగి ఆమోదించినట్లు నిరూపించుకోవాల్సి  ఉంది.