సంఘ శతాబ్దిలో ఇంటింటికీ వెళ్తాం : సునీల్ అంబేకర్

రాష్ట్రీయ స్వయంసేవక్ సంఘ్ శతాబ్ది ఉత్సవాల సందర్భంగా జరిగే సన్నాహకాలను ప్రాంత ప్రచారకుల బైఠక్ విస్తృతంగా సమీక్షిస్తుందని ఆరెస్సెస్ అఖిల భారతీయ ప్రచార ప్రముఖ్ సునీల్ అంబేకర్ తెలిపారు. ప్రాంత ప్రచారకుల బైఠక్ లో చర్చలు, క్షేత్ర అనుభవాలు, ఎదుర్కొన్న సవాళ్లు, సూచించిన పరిష్కార మార్గాలపై చర్చ జరుగుతుందన్నారు. ఈ నెల 4 నుంచి మూడు రోజుల పాటు ఢిల్లీ కేంద్రంగా ప్రాంత ప్రచారకుల బైఠక్ జరగనుంది. ఈ నేపథ్యంలో సునీల్ అంబేకర్ గురువారం ఢిల్లీలోని ఝండేవాలన్ లోని కేశవ కుంజ్ లో విలేకరుల సమావేశం నిర్వహించారు.ఈ సమావేశాలకు దేశం నలుమూలల నుంచి 233 మంది పాల్గొంటారని వెల్లడించారు.

ఈ సందర్భంగా సునీల్ అంబేకర్ మాట్లాడుతూ.. అఖిల భారతీయ ప్రాంత ప్రచారకుల బైఠక్ లో ప్రాథమికంగా అన్ని ప్రాంతాలు, విభాగ్ లు, జిల్లా స్థాయిలో జరుగుతున్న సంఘ కార్యంపై దృష్టి పెడుతుందని తెలిపారు.ఈ సమావేశాల్లో ఆయా ప్రాంతాల్లో సంఘ కార్య విస్తరణ, బలోపేతం అయిన విధానంపై ప్రాంత ప్రచారకులు వివరణాత్మకంగా ఓ ప్రజెంటేషన్ ఇస్తారని, అలాగే వివిధ విభాగాల పనితీరును సమీక్షిస్తూ.. నివేదికలను సమర్పిస్తామని తెలిపారు.

ఈ సమావేశాలు ఈ నెల 4 వ తేదీన ప్రారంభమై.. 6 వ తేదీన ముగుస్తాయని తెలిపారు. శతాబ్ది ఉత్సవాల ప్రణాళికతో పాటు వివిధ అంశాలపై దృష్టిపెడతామన్నారు. అంతేకాకుండా ప్రస్తుతం సంఘ శతాబ్ది నడుస్తోందని, ఈ నేపథ్యంలో సమీక్షలు, మార్గదర్శనంతో పాటు భవిష్యత్తు ప్రణాళికను కూడా చర్చిస్తామన్నారు. వీటితో పాటు సైద్ధాంతిక నిర్దేశనం కూడా జరుగుతుందని, బౌద్ధిక్, శారీరిక్ విభాగాల బలోపేతంపై కూడా లోతైన చర్చ వుంటుందన్నారు.

ఇక ఈ బైఠక్ లో సంఘ్ నుంచి ప్రేరణపొందిన 32 సంస్థల సంఘటనా మంత్రులు కూడా పాల్గొంటారని, వారి కార్యక్రమాలు, వారి భవిష్యత్ ప్రణాళికలు, సాధించిన విజయాలను కూడా బైఠక్ ముందు వుంచుతారని పేర్కొన్నారు.

‘‘ఈ యేడాది సంఘ్ విజయవంతంగా 100 శిక్షా వర్గలు నిర్వహించింది. వాటిలో 75 శిక్షా వర్గలలో 40 సంవత్సరాల కంటే తక్కువ వయస్సున్న వారే పాల్గొన్నారు. మిగిలిన 25 సంఘ శిక్షావర్గలకు 40 నుంచి 60 సంవత్సరాల వయస్సున్న వారు హాజరయ్యారు. వీటికి సంబంధించిన పూర్తి సమీక్ష కూడా ఈ సమావేశాల్లో చేస్తాం. సేవా విభాగంపై కూడా చర్చ జరుగుతుంది. ఉదాహరణకు అహ్మదాబాద్ లో ఇటీవలే విమాన ప్రమాదం జరిగింది. ఇందులో అత్యంత వేగంగా స్వయంసేవకులు అంకిత భావంతో సహాయక కార్యక్రమాల్లో పాల్గొన్నారు. వర్గలలో పాల్గొంటే.. ఇలాంటి కార్యక్రమాల్లో పాల్గొనాలన్న ప్రేరణ కలుగుతుంది. అలాగే వర్గలకు సంబంధించిన వివరణాత్మక గణాంకాలు, నివేదికలు కూడా సమర్పిస్తారు’’ అని సునీల్ అంబేకర్ తెలిపారు.

ఈ సమావేశాలలో ముఖ్యంగా శతాబ్ది సందర్భంగా జరిగే, అమలు చేసే కార్యక్రమాలపైనే ప్రధాన చర్చ వుంటుందని సునీల్ అంబేకర్ అన్నారు. వీటికి సంబంధించిన కార్యక్రమాలు, ప్రణాళికలను రూపొందించమని తాము మార్చి మాసంలోనే అన్ని ప్రాంతాలకు సూచనలు చేశామన్నారు. అయితే.. ఈ సమావేశాల్లో వీటిని మెరుగుపరిచి, తుదిరూపు ఇస్తామని ప్రకటించారు. సరసంఘచాలక్ మోహన్ భాగవత్ అక్టోబర్ 2 న విజయదశమి పర్వదినం నాడు నిర్వహించే ఉత్సవ ప్రారంభంతో సంఘ శతాబ్ది వేడుకలు అధికారికంగా ప్రారంభం అవుతాయన్నారు.