UGC నిబంధనలపై స్పష్టతనిచ్చి, గందరగోళానికి తెర దించండి : ABVP

యూనివర్సిటీ గ్రాంట్ కమిషన్ (UGC) విడుదల చేసిన 2026 కొత్త నోటిఫికేషన్ ను అఖిల భారతీయ విద్యార్థి పరిషత్ స్వాగతించింది. అలాగే ప్రశంసించింది కూడా. కానీ.. ఈ నిబంధనలలో స్పష్టత, సమతౌల్యత కూడా ముఖ్యమేనని నొక్కి చెప్పింది. యూజీసీతో సహా అన్ని సంస్థలు ప్రజాస్వామ్య స్ఫూర్తిని ఉన్నతంగా నిలబెట్టాలని, ప్రతి పౌరుడికి సమాన హక్కులు వుండేలా, వివక్ష లేని సమాజంగా తీర్చడానికి అన్ని విద్యా సంస్థలు ప్రజాస్వామ్య స్ఫూర్తిని నిలబెట్టాలని కోరింది.

విద్యా సంస్థల ప్రాంగణంలో సానుకూల, సమానత్వ వాతావరణం కోసం ఏబీవీపీ ఎల్లప్పుడూ కృషి చేస్తూనే వుంటుందని, ప్రజాస్వామ్య విలువలను ప్రోత్సహించడానికి ఈ నిబంధనలు వున్నాయని విడుదల చేసిన ప్రకటనలో పేర్కొంది. అభివృద్ధి చెందిన భారత్ అన్న దానిని సాకారం చేసుకోవడానికి మనమందరమూ కృషి చేయాలని ఏబీవీపీ పిలుపునిచ్చింది.

అయితే.. ఈ కొత్త నొటిఫికేషన్ కి సంబంధించిన నిబంధనలు, పరిభాషకు సంబంధించి విద్యార్థులలో, తల్లిదండ్రులలో వున్న అస్పష్టత, గందరగోళాన్ని తొలగించడానికి యూజీసీ తక్షణమే చర్యలు తీసుకోవాలని కూడా ఏబీవీపీ డిమాండ్ చేసింది. అలాగే విపత్కర పరిస్థితులు తలెత్తకుండా, వాటిని నిరోధించడానికి చర్యలు తీసుకోవాలని, అలాగే ప్రస్తుతం ఇది కోర్టులో పెండింగ్ లో వుందని, దీనిపై తన వైఖరిని స్పష్టం చేస్తూ యూజీసీ వెంటనే కోర్టులో అఫిడవిట్ దాఖలు చేయాలని కోరింది.

మరో వైపు ఏబీవీపీ జాతీయ ప్రధాన కార్యదర్శి డాక్టర్ వీరేంద్ర సింగ్ సోలంకి మాట్లాడుతూ.. విద్యా ప్రాంగణాల్లో సామరస్యం, సమానత్వం కోసం అవసరమని, దీని కోసం తాము ఎప్పుడూ కృషి చేస్తూనే వుంటామని ప్రకటించారు. క్యాంపస్ లలో అన్ని వర్గాలకు సామాజిక సమానత్వం వుండాలని, క్యాంపస్ లలో ఎలాంటి వివక్షతకు చోటు వుండకూడదన్నారు. దీనిపై తల్లిదండ్రులలో, విద్యార్థులలో గందరగోళం వుందని, దీనిపై యూజీసీ వెంటనే వివరణ ఇవ్వాలని ఆయన డిమాండ్ చేశారు.